Nº de visitas: 928475

Aberto o prazo de inscrición para participar na programación da Casa das Mulleres (xaneiro a abril 2024)
16/01/2024    Máis novas

- OBRADOIRO DE CANTO PARA MULLERES “CON VOZ PROPIA”

Destinado a: mulleres maiores de 18 anos ás que lles guste cantar.

Formadora: Cristal Méndez Queizán.

Obxectivos:

Fomentar a aserción e a propia estima (empoderamento).

Explorar e liberar os recursos expresivos da voz e do corpo.

Incrementar a conciencia e os coñecementos sobre o funcionamento da voz e da respiración para mellorar a voz e a saúde.

Recoñecer e valorar as posibilidades expresivas da voz propia e allea.

Recoñecer recursos persoais utilizando o canto como medio

Construír novas maneiras de relacionarnos, utilizando o canto como medio

Promover os valores de inclusión, integración e respecto da diversidade.

Descrición: utilizando o canto de grupo e individual exploraremos a capacidade expresiva e emocional das nosas voces para recoñecernos e empoderarnos. Paralelamente aprenderanse unha serie de habilidades técnicas para mellorar e facer máis “forte” e “clara” a propia voz. Neste obradoiro o canto é un medio non un obxectivo, polo que non é preciso “cantar ben” e basta coa intención de gozar xuntas a través do canto.

Contidos:

Habilidades de base (técnicas relativas á voz e ao canto): respiración e apoio diafragmático, control dos elementos do tracto vocal superior (padal brando, lingua, epiglote, control dos resoadores etc.) e educación da postura enfocada ao canto.

Habilidades expresivas: exploración corporal do son a través do movemento e a danza, improvisación e composición, canto e improvisación coral, canto e improvisación individual e escoita consciente e activa das nosas voces.

Metodoloxía: utilizaranse moitos recursos da Músico-Terapia e da Danza-Terapia adaptados ás necesidades individuais de todas as participantes. O noso método é participativo e inclusivo, favorecendo o benestar e a integración no grupo así como a creación dun “espazo seguro e protexido” para todas.

Temporalización:

Duración: 8 sesións. 24 horas.

Datas: os luns, do 29 de xaneiro ata o 18 de marzo.

Horario: de 18:00 a 21:00.

Inscrición e participación na actividade:

Inscrición previa (ver proceso de inscrición).

Grupos con capacidade limitada

- OBRADOIRO “SÁCALLE PARTIDO AO TEU MÓBIL”

Destinado a: mulleres maiores de 18 anos con manexo básico en dispositivos Android.

Formadora: Uxía Cazorla Silva.

Obxectivo: proporcionar habilidades para o manexo do móbil e así poder sacarlle maior rendemento.

Contidos:

Actualización do dispositivo e aplicacións.

WhatsApp.

Aplicacións: SERGAS, Concello de Vigo, códigos QR…

Aplicacións de Google: correo electrónico, notas, calendario…

Facer e xestionar fotos. Almacenamento.

Temporalización:

Duración: 8 sesións. 17 horas.

Datas: os luns, do 29 de xaneiro ata o 18 de marzo.

Horario: de 19:00 a 21:10.

Inscrición e participación na actividade:

Inscrición previa (ver proceso de inscrición)

Participación na actividade: condicionada a ter praza confirmada


- CURSO DE FORMACIÓN EN IGUALDADE PARA PROFESIONAIS NO EIDO DA EDUCACIÓN E DO SOCIAL

Destinado a: homes e mulleres maiores de 18 anos con perfil profesional nos eidos social e de educación formal e non formal.

Formadora: Cristina Rodríguez Ramos, experta en Xénero e Igualdade de Oportunidades.

Obxectivo: incorporar a perspectiva de xénero no traballo cotián dentro dos eidos social e educativo.

Contidos:

Introdución á perspectiva de xénero. Consecuencias da socialización diferenciada.

A transversalidade aplicada ao ámbito social e da educación: a coeducación.

Elementos clave para a planificación : a comunicación (linguaxe e imaxes), materiais didácticos, habilidades sociais.

Prevención, detección e orientación no ámbito da violencia machista. Como intervir ante un caso.

Metodoloxía e modalidade:

En liña, a parte teórica (20 horas) soportada sobre Google Classroom e Google Meet. Estas sesións consistirán na exposicións dos contidos, para o que se empregarán documentos, vídeos,…

Presencial, as sesións prácticas que supoñen unha carga lectiva de 5 horas levaranse a cabo na Casa das Mulleres (r/ Romil, 20) os días 14 e 19 de marzo.

Calendario: os martes e os xoves do 15 de febreiro ao 19 de marzo de 18:00 a 20:30.

Acreditación: entregarase un diploma acreditativo do aproveitamento do curso. Para poder obtelo, deberase asistir e ter un aproveitamento do curso de cando menos o 80 %, así como unha cualificación de apta. A avaliación comprenderá tres aspectos: asistencia, probas teóricas e prácticas realizadas e actitude participativa e respectuosa.

Inscrición e participación na actividade:

Inscrición previa (ver proceso de inscrición. Ficha de inscrición específica).

Participación na actividade: condicionada a ter praza confirmada.


- CURSO “INTRODUCIÓN Á TEORÍA CRÍTICA FEMINISTA. APROXIMACIÓN AOS DEBATES CONTEMPORÁNEOS.”

Destinado a: mulleres e homes maiores de 18 anos.

Formadoras: Priscila Retamozo Ramos e Cristina Louzán García.

Obxectivos:

Achegar as principais correntes de pensamento feminista e contextualizar historicamente as chamadas “ondas do feminismo”.

Presentar o pensamento e achegas intelectuais de figuras relevantes na historia do feminismo.

Potenciar a reflexión crítica sobre os actuais debates existentes no seo do feminismo.

Fomentar a capacidade de aplicar conceptos teóricos á nosa vida cotiá.

Crear un espazo seguro de reflexión, onde estean presentes as dinámicas de coidado.

Descrición: neste curso pretendese ofrecer unha aprendizaxe motivada, directa e sinxela, aplicada á realidade e á actualidade do debate feminista. Unha aprendizaxe teórica que nos sirva no noso día a día para entender o mundo e as nosas vivenzas neste.

Contidos:

Módulo 1. Os comezos

Introdución: dende onde falamos?.

Achegamento ao marco teórico conceptual.

¿Feminismo ou feminismos?.

O feminismo pre-moderno.

A querelle des femmes: Christine de Pizan

Módulo 2. Primeira onda:

O feminismo ilustrado.

Olympe de Gouges e Mary Wollstonecraft.

Primeiros feminismos en América Latina e o Caribe.

Módulo 3. Segunda onda

Sufraxismo anglosaxón.

O sufraxio feminino no estado español.

Feminismo socialista e anarquista.

Módulo 4. Terceira onda

Feminismo da igualdade e feminismo da diferenza.

Feminismo liberal e feminismo radical.

Feminismos negros.

Ecofeminismo.

Feminismo decolonial/poscolonial.

Módulo 5. Cuarta onda

Feminismo e posmodernidade: Judith Butler e as teorías queer.

Feminismo multiculturalista.

Feminismo en Latinoamérica.

Feminismo no mundo árabe.

Marco internacional dos dereitos: ONU.

Formato: presencial

Temporalización:

Duración: 15 horas en 10 sesións.

Datas: os martes, do 20 de febreiro ata o 30 de abril (agás o 26 de marzo)

Horario: de 19:00 a 20:30.

Inscrición e participación na actividade:

Inscrición previa (ver proceso de inscrición)

Participación na actividade: condicionada a ter praza confirmada.

Acreditación: entregarase un diploma acreditativo do aproveitamento do curso expedido pola Concellería de Igualdade. Para poder obter este diploma deberase asistir e ter un aproveitamento do curso de cando menos o 80 %.



Proceso de inscrición para todos os cursos:

Prazo de inscrición: dende a publicación da presente convocatoria e ata cubrir prazas.

Ficha de inscrición: deberase cubrir os datos solicitados na ficha de inscrición (DESCARGAR, formato editable). O curso de formación en igualdade para profesionais nos eidos social e da educación ten unha ficha específica (DESCARGAR, formato editable).

Presentación da Ficha de inscrición: enviarase por vía telemática unha ficha asinada por cada unha das actividades solicitadas a casadasmulleres@vigo.org ou ofi.muller@vigo.org

No caso que non sexa posible a vía telemática, farase a entrega presencial da ficha de inscrición asinada na Casa das Mulleres, de luns a venres, 17:30-21:30.

Criterios de admisión nas actividades: Terán preferencia as persoas empadroadas no Concello de Vigo (farase a correspondente comprobación) e que non fixeran ese mesmo obradoiro en pasadas edicións (agás as alumnas do obradoiro de canto para mulleres “Con voz propia”). Logo seguirase o criterio de orde de entrada da solicitude.

Sempre será necesaria a inscrición previa, tendo en conta que se traballará con capacidade limitada.

Confirmación da praza: unha vez admitida comunicarase por enderezo electrónico ou por teléfono.


Arquivos adxuntos:

Cartel coa programación das actividades

Ficha de inscrición xeral (formato editable)

Ficha de inscrición específica para o Curso de formación en igualdade para profesionais (formato editable).

ARQUIVOS ADXUNTOS:
ficha_de_inscricion_xeral.pdf  316 KB
ficha_inscricion_curso_formacion_en_igualdade_para_profesionais.pdf  292 KB
Programa_de_actividades_Casa_das_Mulleres_de_xaneiro_a_abril_2024_.pdf  482 KB